Прэзідэнт Беларусі Аляксандр Лукашэнка падпісаў указ №60 «Аб мерах па ўдасканаленні выкарыстання нацыянальнага сегмента сеткі Інтэрнэт».

Канчатковы варыянт адрозніваецца ад таго, што трапіў у прэсу ў снежні 2009 года, мае больш дакладныя фармулёўкі, але прытрымліваецца таго ж накірунку.

Цяпер галоўную ролю ў рэгуляванні інтэрнэту атрымаў Аператыўна-аналітычны цэнтр пры Адміністрацыі прэзідэнта. Ён будзе мець магчымасць забіраць ліцэнзіі ў правайдэраў, а таксама будзе атрымліваць інфармацыю “аб абаненцкіх прыстасаваннях” карыстальнікаў Сецівам. Фактычна, будзе “перапісаны” кожны мадэм на тэрыторыі Беларусі.

Беларускія ўлады вырашылі старанна ахоўваць аўтарскія правы. Так, цяпер сайты пры капіраванні матэрыялы павінны пазначаць першакрыніцу.

Указ ўпершыню рэгламентуе механізм абмежавання доступу да інфармацыі па патрабаванні карыстальніка інтэрнэт паслуг. Атрымліваецца, што цяпер любы грамадзянін можа запатрабаваць ад “Белтэлекама”: забараніце мне прагляд парнаграфіі! Якім чынам гэта ажыццявіць, указ не ўдакладняе. З іншага боку, калі кожны беларус паведаміць у Аператыўна-аналітычны цэнтр адрас хаця б парачкі порнасайтаў, улады атрымаюць унікальную па паўнаце базу інтэрнэт-парнаграфіі.

Апроч непрыстойнасцяў, можна папрасіць, каб сталі заблакаванымі прапаганду гвалту, жорсткасці і іншых дзеянняў, забароненых заканадаўствам.

Указ уступіць у сілу з 1 ліпеня 2010 года.//Андрэй Кляноўскі