Кітайскія копіі вядомых тэлефонаў за $100-150 усё набіраюць папулярнасць. Тое, што кітайцы – майстры на ўсе рукі, ні для каго не сакрэт. Іх козыры – гэта агромністыя чалавечыя рэсурсы і танная працоўная сіла. Кітайская тэхніка не мае іміджу надзейнай, але недарагім варыянтам лічылася заўсёды. Цяпер тамтэйшыя ўмельцы ўзяліся за тэлефоны. Часцей за ўсё яны капіруюць Nokia і I-Phone. Ад арыгінала застаецца знешні выгляд, а вось унутры – сапраўдны вэрхал. Распрацоўшчыкі прытрымліваюцца правіла – чым больш функцый, тым лепш.
Купіць кітайскую копію тэлефона – вялікая рызыка. Хоць такія мабільнікі і ўдасканальваюцца ўвесь час, ніхто не гарантуе, што менавіта ваш апарат акажацца працаздольным. Узважым плюсы і мінусы.

“За”

Самае галоўны аргумент у падтрымку неда-нокій – цана. Дзе яшчэ знойдзеш тэлефон на дзве сім-карты, тэлевізар, дыктафон, радыёпрыёмнік, фота- і відэакамеру за $100-150? Прытым што сапраўдны айфон каштуе як мінімум $500… Ды ў дадатак з падтрымкай картак памяці, сенсарным дысплэем і блютусам! Мабільнікі проста перапоўнены ўсялякімі прыемнымі дробязямі накшталт ліхтарыка і відэапрайгравальніка.
Тэлевізар, у існаванне якога мала хто верыць, працуе даволі ўпэўнена. Напрыклад, у Мінску антэна ловіць восем тэлеканалаў, хоць і ў не вельмі добрай якасці.

“Супраць”

Як ні прыемна ашчадзіць грошы пры пакупцы, варта памятаць пра небяспеку застацца праз тыдзень з непрацоўным мабільнікам. Кітайскі тэлефон – кот у мяшку. Ніхто не ведае, якога выбрыка ад яго чакаць. Можа, заўтра ўключыцца, а можа і не. Хоць некаторыя прадаўцы і даюць гарантыю, сервісных цэнтраў па рэмонту такіх мабільнікаў яшчэ няма.
На такіх тэлефонах звычайна напісана “5 мегапікселяў” ці нават “8 мегапікселяў”. Прытым што ў рэальнасці здымкі атрымліваюцца ў жахлівай якасці і памерам 640*480.
Тэлефоны пакуль што не падтрымліваюць платформу JAVA, таму гульні ці праграмы кшталту ICQ і Opera на тэлефоне не запусцяцца. Ды і інтэрнэт працуе не заўсёды. Настройкі для яго трэба шукаць асобна.
Якім бы моцным ні быў акумулятар, доўгі прагляд тэлевізара пасадзіць яго за пару гадзін.//Андрэй Кляноўскі