Генеральная пракуратура Беларусі падсумавала вынікі сваёй дзейнасці за мінулы год. Як высветлілася, колькасць злачынстваў карупцыйнай накіраванасці павялічылася на 23 працэнты ў параўнанні з 2008-м.

Трэцюю частку ад усіх карупцыйных злачынстваў (а іх за мінулы год было выяўлена 3366) складае хабарніцтва, пасля крадзеж шляхам злоўжывання службовымі паўнамоцтвамі, злоўжыванне службовымі паўнамоцтвамі, злоўжыванне ўладай з карыслівымі мэтамі і інш.

1746 чалавек здзейснілі карупцыйныя злачынствы ў мінулым годзе. З іх 108 прадстаўнікоў улады, 14 мелі адказнае службовае становішча.

Самай карумпаванай сферай стаў – гандаль. Тут зарэгістравана 482 выпадкі злачынстваў. На другой прыступцы -- прамысловасць (427), на трэцім месцы – органы дзяржкіравання (421). За імі ідзе сельская гаспадарка, будаўніцтва і сфера адукацыі.

Як паведамляюць крыніцы з пракуратуры, карупцыя знізілася ў сферы аховы здароўя, фінансавага пасрэдніцтва і сельскай гаспадаркі.

Аднак павелічэнне карупцыі адбылося па ўсіх абласцях Беларусі. “Чыстымі”, згодна дадзеных, засталося пару дзесяткаў раёнаў. Напрыклад, Ганцавіцкі, Івацэвіцкі, Полацкі, Жыткавіцкі і іншыя.

Найбольш буйныя і гучныя справы ўзбуджаны ў адносінах да намесніка старшыні камісіі па спажывецкім рынку і прадпрымальніцтву Мінскага гарадскога Савета дэпутатаў Юрыя Мікіцкага, генеральнага дырэктара ААТ “Гомельшкло” Юрыя Ільявога, кіраўніка адміністрацыі Кастрычніцкага раёна г.Мінска Міхаіла Цыгана.

Беларусь знаходзіцца на трэцім месцы сярод краін СНД па колькасці хабараў. Нас абганяюць толькі Расія і Украіна.

2009 год быў абумоўлены фінансавымі цяжкасцямі з-за сусветнага эканамічнага крызісу. Зарплаты ў многіх сферах сталі нашмат меншымі. Скараціліся яны, відаць, і ў чыноўнікаў. Магчыма гэты фактар і стаў адной з прычын пошуку альтэрнатыўных крыніц прыбытку.//Мікола Ляўчук