Чыя галава выратуе Беларусь ад эканамічнага крызісу? Хто не дасць у крыўду дзяржаўны ўраджай бульбы? Рукі каго перапішуць усё насельніцтва рэспублікі?
Не, гэта будзе зусім не той, пра каго вы падумалі. Выратавальнікам нашай краіны, на думку стваральнікаў сацыяльнага студэнцкага серыялу “RoboГОП”, стане аднайменны робатачалавек. Менавіта ён і ў крызіс і ў перапіс адлюстроўвае думку народа, прапануе згодна свайго ГОПаразумення шляхі вырашэння складаных сітуацый. У крызіс Робо з эканамічных меркаванняў пазбаўляецца сваёй жонкі, падчас уборкі бульбы спрабуе знайсці шляхі яе збыту ў буфеце і на мясцовым рынку, на працягу перапісу стараецца перапісаць усіх гопнікаў і геймераў і г.д.
РобоГОП – гэта рымэйк папулярнага серыялу "Robocop". Як і яго правобраз, беларускі супергерой таксама змагаецца з нясправяддлівасцю беларускай рэчаіснасці.
Ідэя здымаць фільм пра беларускага супергероя ўзнікла ў адным з пакояў інтэрнату № 10 БДУ. Акурат у час абвалу індэксаў на амерыканскіх біржах – увосень мінулага года.
-- Усё было так. Нашаму Віці Светламу прыехала з дома пасылка, уласна гэта і была знакамітая каробка “Беліта Вітэкс”, -- расказвае Стасан Чарнуш, выканальнік галоўнай ролі, -- Ён пасылку з’еў, а каробачка засталася. А пасля паглядзеў, што форма цікавая, і намаляваў на каробцы твар страшны, з пятачком такім дзёрзкім. Спачатку я гэтую каробку нацягнуў на сябе, потым мы пачалі здымаць усё гэта на відэа.
-- А калі мы ўсё гэта прагледзелі, то зразумелі, што гэта сігнал з космасу. А на экране хто быў, ну, канешне, роба. а чаму ГОП, таму што гэта ж свой “пацан”, -- працягвае Віця Светлы, -- Калі ўзнікае патрэба, мы здымаем серыі. Усе ідэі прыходзяць спантанна, з космасу. Яны лётаюць у паветры, іх не трэба выдумляць.
-- RoboГОП сярод нас. RoboГОП бачыць нас. RoboГОП дапаможа нам! – упэўнены стваральнікі серыялу.
На сённяшні момант свет пабачылі 8 серыяў фільма. Серыял РобоГОП ужо супрацоўнічае з часопісам Mediamagazine 34. Ён таксама “засвяціўся” на расійскім фестывалі home video "Мегаполис-Мегапиксели", які пройдзе 26 снежня ў Піцеры.//Настасся Ляўчук
Даслаць камэнтар