Што рабіць, калі нейкі сайт заблакаваны, а патрапіць на яго вельмі хочацца?
Адзін з самых простых спосабаў – выкарыстанне сайта-ананімайзера ці проксі-сервера. Тады на веб-старонку трэба будзе заходзіць не напрасткі, а ў абыходную. Калі “Белтэлекам” заблакуе доступ на сайт для наведвальнікаў з Беларусі, ананімайзер спачатку злучыцца з серверам дзе-небудзь у Акіяніі. Паколькі для таіцян ці гвінейцаў доступ на сайт наўрад ці будзе закрыты, ён адыкрыецца. Магчыма, сайт будзе загружацца даўжэй, чым звычайна, але інфармацыя ўсё ж будзе атрыманая.
Дзе шукаць ананімайзеры? Дастаткова ў любым пошукавіку набраць “веб-проксі” ці “веб-анінімайзер” – і з’явяцца дзесяткі варыянтаў. Напрыклад, , , . Працаваць з імі лёгка – на старонцы ў пустым полі набраць nn.by і націснуць Enter на клавіятуры.
Такім самым чынам вырашаецца праблема заблакаваных сайтаў (напрыклад, сацыяльных сетак ці забаўляльных рэсурсаў) у офісе. Калі ва універсітэцкай медыятэцы закрыты ўваход на “Укантакце” ці “Аднакласнікаў”, трэба быцт хітрэйшым за адміністрацыю. Ананімайзер дапаможа.
Яшчэ адзін плюс у інтэрнэт-ананімнасці знаходзяць тыя, хто хоча на ўсялякі выпадак схаваць сваё месцазнаходжанне. Не сакрэт, што міліцыі не дазваляе складанасцяў вызначыць, з якога адрасу было адпраўлена паведамленне на форум ці электронную пошту. Гэта датычыцца як інтэрнэт-адрасоў, так і фізічнага месцазнаходжання. Калі ж праца будзе весціся праз ананімайзер, адзіны, на каго выйдзе міліцыя – той самы няшчасны сервер з Акіяніі.
У сеціве існуюць сайты, доступ на які адкрыты толькі для наведвальнікаў з пэўных краін. Напрыклад, толькі для карыстальнікаў з ЗША ці Германіі. Няма праблем – прыкінемся замежнікамі! Калі знайсці амерыканскі ці нямецкі веб-ананімайзер, атрымаць напаўсхаваную інфармацыю будзе не праблема.
Проксі-серверы падыйдуць і тым, хто хоча ашчадзіць трафік – колькасць закачанай інфармацыі. Рэч у тым, што яны могуць перадаваць дадзеныя ў сціснутым выглядзе. “Распакоўка” ж будзе адбывацца непасрэдна на кампутары.//Ягор Марціновіч
Даслаць камэнтар