Скончылася пара адпачынку і вяселля, скончылася лета, і наступіла восень. Значная частка моладзі ізноў накіравалася атрымліваць веды альбо, папросту кажучы, «стачивать зубы о гранит науки». Ізноў пачаліся манатонныя будні з парамі і, канешне ж, праблемамі :). Таму, каб хоць як-небудзь развеяць гэтую сумоту МПГ «Студэнцкая Рада» (Мінск) і МГА «Дзедзіч» (Брэст) аб’яўляюць конкурс прац студэнцкай творчасці, вынікам якога стане студэнцкая выстава ў канун святкавання Міжнароднага Дня Студэнта – 17 лістапада. Сама ж выстава пад “кодавай” назовай “Цяжка быць студэнтам” адбудзецца 7-8 лістапада ў адным з выставачных цэнтаў горада Мінска.

Удзельнікам конкурсу прапаноўваецца рэалізаваць сябе і свае ідэі з дапамогай фатаграфій, малюнкаў, карцін, вершаў і любых рэчаў, якія можно лёгка зрабіць на парах і ў свабодны ад іх час, раскрываючыя наступныя тэмы:

• правы студэнтаў ва Ўніверсітэце/інтэрнаце;

• адносіны ў трохкутніке студэнт-выкладчык-адміністрацыя;

• праблема самарэалізацыі/вольнага часу студэнтаў;

• беларускі студэнт і яго “адметнасць”/студэнт Беларусі ў будучыні.

Дадзенныя тэмы не з’яўляюцца жорсткімі рамкамі, таму крэатыў і цікавы падыход да прац удзельнікаў вітаецца!

Па кожнаму з тэматычных раздзелаў незалежным журы з ліку простых студэнтаў будуць вызначаны пераможцы. Таксама непасрэдна на самой выставе яе наведвальнікі змогуць аддаць свой голас за тую альбо іншую працу, якая спадабалася, пасля чаго пераможца атрымае прыз глядацкіх сімпатый. Усе пераможцы будуць узнагароджанны каштоўнымі падарункамі ад “Студэнцкай Рады” і ”Дзедзіча”.

Умовы ўдзелу:

- працы прымаюцца з 12 кастрычніка да 6 лістапада;

- дасылаць працы трэба на электронную пошту student.konkurs@gmail.com з пазнакай “Конкурс”;

- памер здымкаў 900х600 пікселяў (у асаблівых выпадках дазволена болей);

- працы павінны мець назву і кароткае апісанне таго, што жадаў паказаць аўтар;

- аўтар пазначае ў лісце свае кантакты: імя, прозвішча, узрост і тэлефон.

Па ўсім пытанням можна заўжды звязацца з арганізатарамі па тэл.: (МТС) (033) 664-36-48 (Віктар), (Velcom) (029) 382-90-02 (Алесь).