У імгненне, калі дым рассеяўся, і храпучы ад доўгага рыку матор стаіўся, каб аддыхацца, у паветры нечакана павісла поўная цішыня. А разам з ёй і сцягі краін удзельнікаў. І у гэтай якая цішыні, скрозь клубы асядаючага дыму і смуроду ад спаленых пакрышак і тармазных калодак гледачы выявілі… меланхалічнага выгляду прыбіральшчыкаў, што змяталі з арэны шматкі аўтамабільнай гумы.

Паддай яшчэ парку, лазеншчык! Дакладней – не так… “Паддай яшчэ дымку, гоншчык!” – раўлі трыбуны, у той час, як вядучы шоў умольваў удзельнікаў “не паліць на месцы”. У дыме і рове рухавікоў, у вар'яцкім вальсе машын, якія ляцяць у занос, у бачнасці не больш метра, здавалася, толькі цудам сапернікі не закраналі адзін аднаго.

Але ўсё што адбывалася, на самай справе, цудаў не датычылася. Нічога, акрамя высокага прафесіяналізму, любові да хуткасці і адчування “адрэналінавай ліхаманкі”...

Больш за дваццаць прафесійных гоншчыкаў, лепшых дрыфтэраў Літвы, Латвіі, Украіны, Расіі і Беларусі, падарылі сотням аматараў аўтаспорту яркае і эфектнае дзейства – 26 верасня ў ГСАК “Лагойск” прайшлі спаборніцтвы па дрыфце.

Дрыфт – гэта тэхніка праходжання паваротаў з наўмысным зрывам задняй восі, у заносе, на максімальна магчымай для ўтрымання на трасе хуткасці. Гэтае ашаламляльнае шоў, у якім размаляваныя ўсімі колерамі вясёлкі і лагатыпамі ўсіх магчымых фірм машыны паказваюць філіграннае кіраванне ў заносе на вялікай хуткасці, ствараючы вакол сябе клубы дыму і запаўняючы гукавую прастору ровам сваіх магутных матораў.

Але не ўсе, нават адмыслова падрыхтаваныя аўтамабілі вытрымліваюць падобныя нагрузкі. І машыны, якія выходзяць са строю падчас спаборніцтваў, часам, прыходзіцца прыводзіць у рух усяго некалькімі “конскімі сіламі”. Заглухлую турбіну маскоўскага экіпажу ссунулі з месца ўсяго чатыры “конікі”, але, судзячы, па энергічных скачках, вельмі жвавыя...

А вось так выглядаюць шлюбныя гульні самцоў-дрыфцістаў, што, акружыўшы прывабных самак, якія сядзяць ва ўнікальным для Беларусі Ferrari 430, фліртуюць... дакладней, дрыфтуюць напрапалую, клапатліва ахінаючы выбранніц густым дымам, сажай і шмаццём спаленай гумы. 

Самыя моцныя экіпажы суседніх краін, здзіўляючы публіку сваім эфектным знешнім выглядам і магутнасцю, змагаліся за галоўны прыз спаборніцтваў – Кубак чэмпіёна.

Суддзямі ацэньваецца вугал заносу, хуткасць, блізкасць аўтамабіля да кантрольнай кропкі, відовішчнасць і стыль, а для парных заездаў – таксама блізкасць машын сапернікаў адзін да аднаго і паўтор траекторыі наперадзе ідучага.

Акрамя віртуознага дрыфту, госці спаборніцтваў сталі сведкамі BURNOUT show – спаборніцтваў па спальванні гумы.

Нягледзячы на невялікі кошт уваходных квіткоў (30 тысяч рублёў), трыбуны былі запоўненыя гледачамі, якія вішчалі ад захаплення. “Хлеба і відовішчаў” аказалася больш чым трэба. Дым валіў адусюль: прычым шашлычныя сваёй дымавой завесай не саступалі ў эфектнасці майстрам спальвання гумы.