27 чэрвеня адбылася канфэрэнцыя "Супрацоўніцтва моладзевых арганізацыяў”, арганізаваная Асамблеяй няўрадавых дэмакратычных арганізацыяў.

Падчас канэфрэнцыі большасьцю моладзевых дэмакратычных арганізацыяў была прынятая Рэзалюцыю, у якой моладзь заклікае спыніць усе формы перасьледу моладзі па палітычных матывах; спыніць практыку гвалтоўнага прызыву ў войска і пачаць пераход да прафэсійнага войска; выключыць з Крымінальнага кодэксу артыкул 193-1, скасаваць забарону на дзейнасьць незарэгістраваных грамадзкіх аб’яднаньняў ва ўсіх актах заканадаўства Рэспублікі Беларусь; увесьці заяўны прынцып рэгістрацыі моладзевых і іншых грамадзкіх арганізацыяў.

Усе прысутныя выявілі гатоўнасьць узяць удзел у кампаніі “Стоп 193.1” і жаданьне уплываць на важныя палітычныя працэсы. У тым ліку - Усходняе партнэрства праз Форум грамадзянскай супольнасьці. Арганізацыі вырашылі правесьці цягам бліжэйшых дзён кансультацыі, вывучыць сытуацыю і паспрабаваць знайсьці інструмэнт уплыву.

Дыскусыю выклікала “Канцэпцыя моладзевай палітыкі”, распрацаваная зь ініцыятывы арганізацыі “Маладыя Дэмакраты” Клюбам маладых экспэртаў цэнтру "Мізэса". Як вынік, моладзь прыйшла да высновы, што гэтая канцэпцыя - дапаможны матэрыял для арганізацыяў у працы з мэтавымі групамі, гатовыя і аргумэнтаваныя адказы на шэраг пытаньняў.

Моладзевыя лідэры вызначылі некалькі тэмаў, якія цікавяць вялікую колькасьць моладзевых арганізацыяў: студэнцкае самакіраваньне, мясцовыя выбары, дзеяньні дзеля абароны нацыянальных сымбаляў і культуры. Моладзь працягне перамовы наконт скаардынаваных дзеяньняў вакол гэтых тэмаў.