Новая кніга спадарыні Дануты - кніга нарысаў, мемуараў і эсэ – мае назву “Хадзі на мой голас”.

Данута Бічэль-Загнетава - вядомая грамадская дзеячка, адна з арганізатараў і актыўных удзельнікаў суполкі Максіма Багдановіча, зь верасня 1988 - сябра БНФ. Прымала ўдзел у мітынгах, якія праходзілі ў Горадні. Каардынавала дзейнасьць рэгіянальных суполак БНФ у Гарадзенскай вобласьці. Была адным з ініцыятараў выпуску самвыдавецкай газэты "Рэанімова". Вядомасьць да Дануты Янаўны прыйшла са зборнікам вершаў «Дзе ходзяць басанож». Займаецца грамадскай, літаратурнай, асветніцкай дзейнасцю.

У яе кнігу “Хадзі на мой голас” увайшлі творы, якія яшчэ зь мінулага стагоддзя друкаваліся ў часопісе “Наша вера”. Гэта эсэ пра яе любімых паэтаў і пісьменьнікаў. У прыватнасьці, пра Максіма Багдановіча, Васіля Быкава, Аляксея Карпюка,

Артура Цяжкага, Ларысу Геніюш, Зоську Верас, Ірыну Крэнь, Анатоля Сыса, Хрысьціну Лялько, Янку Брыля, Уладзімера Караткевіча, Натальлю Арсеньневу, айца Ўладзіслава Чарняўскага, Чэслава Мілаша. У кнігу таксама ўвайшлі лісты Ларысы Геніюш і Натальлі Арсеньневай, камэнтары да іх. Бічэль-Загнетава пісала пра дарагіх ёй людзей, зь якімі яе зьвязаў лёс.

Першапачаткова плянавалася, што кніга выйдзе ў выдавецтве “Pro Christo”. Пасьля з’явіліся праблемы з фундатарамі, выдавецтва было перагружана. Але, на шчасьце, ініцыятыву праявіў “Гарадзенксі рух “За свабоду”. Пад іх кіраўніцтвам распачалося выдавецтва шэрагу кніг славутых беларускіх паэтаў і пісьменьнікаў, якія маюць заходнебеларускія карані. Павал Мажэйка, прэс-сакратар руху, прапанаваў супрацоўніцтва і Дануце Янаўне, на што тая з задавальненьнем пагадзілася. Такім чынам, за восень-зіму аўтарка напісала астатнія ўспаміны. Так на сьвет з’явілася кніга “Хадзі на мой голас”.

Кніга цікавая тым, што спадарыня Данута піша пра блізкіх ёй людзей, узгадвае як побытавыя сітуацыі, так і гістарычна важныя падзеі для ўсёй краіны. Дзякуючы гэтаму, можна ўбачыць знаёмых творцаў зь невядомага боку, зразумець, якімі яны былі ў стасунках з творчымі сябрамі, а таксама адчуць зьмены гістарычныя, эканамічныя і палітычныя ў краіне праз прызму бачаньня літаратаркі.

Прэзентацыя кнігі “Хадзі на мой голас” і сустрэча з аўтаркаю адбудзецца ў нядзелю, 23 лістапада, у 17.45 у Чырвоным касьцёле сьвятых Сымона і Алены. На прэзентацыі можна будзе набыць новы твор з аўтографам Бічэль-Загнетавай, а таксама задаць пытаньні славутай літаратарцы. //Дар’я Гуштын