Трапіць у брытанскі шоў-бізнэс – мара хіба кожнай амбітнай музычнай каманды. Беларускія музыкі тут не выключэнне. Нашы рокеры, электроншчыкі, панкі ды эстраднікі ў розныя часы намагаліся заваяваць ангельскую сцэну.

Далей за ўсіх справа зайшла хіба ў “Крамы”, якая ў далёкім 1993 годзе выдала ў Вялікабрытаніі ангельскамоўную вэрсію свайго альбому “Хворы на рок-н-рол” ды ў “Svet Boogie Band”, што скарылі ангельскіх аматараў блюзу сваім выступам на “The Global Battle of the Bands” два гады таму ў Лондане. Беларускі гурт DALI пайшоў яшчэ далей. Толькі што Віктар Рудэнка з сваімі музыкамі вярнуўся з туру па Ангельшчыне ды Шатландыі.

- Мы дамовіліся на выступ у трох месцах - самых важных з музычнага гледзішча: Эдынбург, Ліверпуль і Лондан. Асабліва было прыемна выступаць у клубе Magnet, дзе некалькі выступаў Фрэдзі Мэрк’юры. Хацелі яшчэ выступіць у “Covern Club”, дзе гралі Beatles, але там запланавана ўсё на некалькі месяцаў наперад.

Промоцыяй гурта DALI ў Вялікай Брытаніі занялася прадусарка Лінда Грэм. Яна ўжо мела досвед працы з беларускімі артыстамі. Праўда, як яна патлумачыла Віктару Рудэнку – не вельмі ўдалы.

- Яна сказала: “Добра, што вы прыехалі, а то я лічыла, што ў Беларусі спяваюць усе пад “мінус адзін”. Лінда займалася выступам Агурбаш у Англіі, дык тая прыехала з фанаграмай замест музыкаў. А ў іх так толькі караоке спяваюць.

Тур DALI па Вялікай Брытаніі цягнуўся два тыдні. Ангельскія прадусары зацікаваліся творчасцю каманды ды прапанавалі выдаць альбом на тэрыторыі Вялікабрытаніі. Цяпер справа за беларускімі музыкамі – давесці да розуму свой матэрыял. Дарэчы, Віктар Рудэнка мяркуе запісаць дзве версіі альбому – па-ангельску і па-беларуску. 

- DALI цяпер гучаць зусім інакш, бо мы скінулі пэўныя ланцугі, што накладалі на нас беларускія абставіны. Мы вырашылі не граць музыку, якая можа прынесці папулярнасці ці грошы тут. Мы граем еўрапейскую музыку. А ад ангельцаў нас адрознівае тое, што ў нас была і ёсць беларуская душа, хоць выконваем мы нешта накшталт “Audioslave”. 

Між тым, ужо гатова песня і рыхтуецца кліп DALI для адборачнага туру да “Еўрабачання-2009”. Беларускія музыкі будуць намагацца патрапіць на фестываль ад Польшчы. Польскі прадусар гурта Ігар Знык упэўнены, што DALI маюць шанцы на перамогу ў адборы.

- У параўнанні з тым, што было на ранейшых фестывалях ад Польшчы, песня ў DALI падаецца якаснай. На канцэртах DALI у Польшчы было бачна, што іх музыка даспадобы мясцовым слухачам. Канешне, падчас прома-кампаніі будзе зазначана, што гэта беларускі гурт. Мяркую, што гэта ім дапаможа.

Песня да польскага адбору на “Еўрабачанне” DALI напісаная па-ангельску, але музыкі вырашылі ўключыць у яе прыпеў па-беларуску.

//www.racyja.com