Учора ў Вене прайшоў фінальны матч Еўра-2008, у якім гулялі каманды Германіі і Іспаніі. Калі немцы рэгулярна заваёўваюць медалі топ-турніраў – чэмпіянатаў свету і Еўропы, то іспанцам на іх не шанцавала, хаця гэтую зборную ўвесь час называлі фаварытамі. 

І вось нарэшце Іспанія выйграла золата. Адзіны пераможны гол забіў на 33-й хвіліне нападаючы Фернанда Торэс. Іспанцы маглі забіць і яшчэ – яны наогул дамінавалі, хаця мячом трохі больш валодалі немцы – 52% на 48%.

Абаронца зборнай Германіі Філіп Лам пасля матча паразважаў пра прычыны паразы: “Мы не былі зараджаныя на атаку, як гэта было ў папярэдніх матчах. Нашы камбінацыі былі зусім не хуткія, і гэта прыводзіла да вялікай колькасці памылак. Гэта дазволіла іспанцам узяць гульню ў свае рукі. Натуральна, мы хацелі заваяваць чэмпіёнскі тытул”.

Герой матча Торэс сказаў, што іспанцы зрабілі тое, што хацелі зрабіць: “Каманда паказала свій лепшы футбол. У камандзе гулялі лепшыя футбалісты. І мы шчаслівыя, таму што лепшыя”.

//www.racyja.com