У асноўную праграму XVII Міжнароднага кінафестывалю "Залаты Віцязь" уключана 11 беларускіх фільмаў. Гэты аўтарытэтны кінаагляд пройдзе з 22 па 31 мая ў Маскве.

Як расказалі карэспандэнту БЕЛТА у аргкамітэце фестывалю, беларускія кінастужкі заяўлены ў 4 з 6 конкурсных праграм. Так, за перамогу ў самай прэстыжнай намінацыі "Ігравы поўнаметражны фільм" будзе весці барацьбу карціна Марыі Можар "Ворагі". У конкурсе анімацыйных фільмаў прадстаўлены адразу 4 беларускія стужкі: "Як зрабіць адкрыццё" Аляксандра Ленкіна, "Беларускія прымаўкі" Міхаіла Тумелі, "Тры Янгалы" Юліі Рудзіцкай і створаны цэлым калектывам рэжысёраў мультфільм "Аповесць мінулых гадоў".

Тры беларускія фільмы адабраны ў праграму дакументальных кароткаметражак: "Ва ўсе гэтыя дні" Міхаіла Жданоўскага, "Мама прыйдзе" Галіны Адамовіч і "Мужыкі" Юрыя Азаронка. Беларускія студэнцкія і дэбютныя работы будуць прадстаўлены фільмамі "Калі твой сын рэжысёр" Дар'і Юркевіч і "Вяртанне" Дзяніса Галака.

Акрамя таго, тры беларускія карціны - "Айцец Сергій" Станіслава Гайдука, "Святое месца" Галіны Адамовіч і "Паэма веры" Андрэя Куцілы - будуць дэманстравацца на пазаконкурснай праграме "Рэлігія і XXI стагоддзе".

Усяго ў конкурсных праграмах "Залатога Віцязя" заяўлена больш як 220 фільмаў розных жанраў з 31 краіны. У кожнай з намінацый міжнароднае журы па традыцыі прысуджае Залатога, Сярэбранага і Бронзавага Віцязяў, а паводле рашэння старшынь усіх журы лепшаму фільму любога жанру будзе ўручаны Гран-пры. Дарэчы, беларускія кінематаграфісты дастойна прадстаўлены і ў складзе судзейскай калегіі. Працаваць у фестывальным журы запрошаны народны артыст Беларусі Уладзімір Гасцюхін, кіраўнік Тэатра-студыі кінаакцёра Аляксандр Яфрэмаў, кінадраматург Ірына Дзям'янава, рэжысёр Аляксандр Ленкін і кінакрытык Людміла Саянкова.

//БЕЛТА