У Беларусі больш за 40 тысяч ганаровых донараў пазбавяцца льготаў Іна Студзінская, Менск 14 чэрвеня з ініцыятывы Ўсясьветнай арганізацыі аховы здароўя 192 краіны сьвету будуць адзначаць Дзень донара. Беларускія ганаровыя донары маюць намер 14 чэрвеня, на традыцыйнай сустрэчы ў Рэспубліканскім навукова-дасьледчым інстытуце гематалёгіі і трансфузіялёгіі, абвясьціць пра страйк супраць адмены льготаў.

Ганаровы донар з Магілёва Ігар Каваленка цяпер займаецца стварэньнем грамадзкай арганізацыі донараў “Кропля жыцьця”, разам зь юрыстамі працуе над статутам. Менавіта магілёўскія донары выступілі з ініцыятывай страйку.

Гаворыць Ігар Каваленка:

“14 чэрвеня я буду ў Менску ў Інстытуце пераліваньня крыві й паспрабую дабрацца да трыбуны. І з гэтай трыбуны ўжо абвясьціць пра страйк з нагоды скасаваньня льготаў”.

“А як вы думаеце, колькі чалавек гатовыя да страйку?”

“Ведаеце, беларусаў цяжка раскачаць. Але ж ужо пайшлі званкі адусюль: і зь Берасьця, і з Гомелю — пасьля публікацыяў у газэтах, тэлебачаньня, тэлефануюць, запісваюцца. З нашымі ўладамі немагчыма дамаўляцца, трэба страйкаваць, і ўсё!” — кажа магілёўскі донар Каваленка.

Нядаўна абедзьве палаты Нацыянальнага сходу пастанавілі скасаваць ільготы для ганаровых донараў: гэта зьніжкі на лекі й санаторныя пуцёўкі, дабаўкі да пэнсіі, бясплатнае зубапратэзаваньне.

Паводле інфармацыі намесьніка дырэктара НДІ гематалёгіі і трансфузіялёгіі Эсьфіры Сьвірноўскай, больш за 2 мільёны беларусаў хаця б раз у жыцьці здавалі кроў. Ганаровых донараў у краіне на сёньняшні дзень — 40 271 чалавек.

Ці палічылі чыноўнікі Міністэрства аховы здароўя, кіраўніцтва Інстытуту гематалёгіі і трансфузіялёгіі, наколькі істотная для дзяржавы агульная сума паступіць у бюджэт пасьля скасаваньня льготаў 40 тысячам ганаровых донараў?

Прадстаўніца Ўпраўленьня арганізацыі мэдыцынскай дапамогі Мінздраву Тацяна Мігаль адказала, што не лічылі, — але прызнала, што сума ня надта вялікая, эканоміку яна не ўратуе.

Намесьніца дырэктара НДІ гематалёгіі Эсьфір Сьвірноўская падкрэсьліла, што кампэнсацыі пры кожнай здачы крыві ніхто не адмяняе. У донараў застанецца бясплатнае харчаваньне ў дзень здачы крыві, аплата двух працоўных дзён. Скасаваньне льготаў, кажуць, не закранае штодзённага донарства.

Чыноўніцы пастаянна нагадвалі сэмантыку слова “донар”, што азначае “дарыць”. Яны спасылаліся на рэкамэндацыі Ўсясьветнай арганізацыі аховы здароўя — гэтая міжнародная структура вітае дабрачынную й бязвыплатную здачу крыві. А ў беларускіх донараў, маўляў, было найбольш у сьвеце льготаў і сацыяльных гарантыяў.

Дырэктар НДІ гематалёгіі і трансфузіялёгіі прафэсар Міхаіл Патапнёў прызнаў, што пасьля скасаваньня льготаў колькасьць донараў у Беларусі можа паменшыцца.

"Свабода"