Кажуць, зараз кожны, хто выдае з горла якiя-небудзь гукi i мае пры гэтым грошы, можа стаць спеваком. Гэты ж гурт парушае стэрэатыпы сваiмi акустычнымi канцэртамi i тэкстамi з глыбокiм сэнсам. I няхай iм толькi тры гады i яны не маюць пакуль свайго дыска, можна з упэўненасцю сказаць, што гурт "Босае сонца" не застанецца незаўважаным на беларускай сцэне.
Гурт узнiк у 2006 годзе. Першапачаткова гэта быў дуэт Алеся Зайцава i скрыпачкi Аляксандры Баброўнiк. Зараз гурт складаецца з пяцi чалавек. Гэта Алесь Зайцаў — вакал, гiтара, Ксенiя Кручык — акардэон, Аляксандра Старасценка — скрыпка, Аляксандр Ясiнскi — бас-гiтара, баян, Арцём Рулёў — барабаны. У сваёй капiлцы музыкi маюць другое месца на польскiм фестывалi "Бардаўская восень-2007", удзел у сёлетнiм фестывалi "Басовiшча", два клiпы на песнi "Колеры" i "Новая вясна", апошнi "засвяцiўся" ў праграме "ПРОдвижение" на тэлеканале "Лад".